Ffuglen Werin: Adrodd y Stori

Mae straeon gwerin ymhlith ein ffurfiau naratif hynaf a mwyaf dylanwadol. Maen nhw wedi bod yn asgwrn cefn ar gyfer gwaith ysgrifennu ffantasi a ffuglen ddychmygus, o lyfrau plant a llyfrau i bobl ifanc i ffuglen genre a ffuglen lenyddol i oedolion. Yn ystod y blynyddoedd diwethaf mae adfywiad straeon gwerin dystopaidd, llên gwerin ecolegol ac arswyd gwerin yn profi bod y grefft benodol yma o adrodd straeon yr un mor berthnasol ag y bu erioed. Beth bynnag ydy’ch diddordeb yn y genre, bydd y cwrs yma’n rhoi’r ddealltwriaeth a’r sgiliau i chi weithio gyda llên gwerin yn eich straeon eich hun ac archwilio’r ystyr dwfn sy’n gallu dod i’r wyneb mewn ffuglen werin.

Byddwn yn ymchwilio i’r amryfal ffyrdd y gallwn gymryd llên gwerin o ddifri, fel rhan o fywydau go iawn a bywydau dychmygol, a’i defnyddio fel man cychwyn ar gyfer creu ein bydoedd ffuglennol ein hunain. Drwy weithdai cyfranogol, gan gynnwys ymarferion ysgrifennu, darllen a thrafod, byddwch yn datblygu darnau ysgrifennu newydd fydd yn tyfu o hedyn llên gwerin. Byddwn yn chwilio am lên gwerin yn ein bywydau beunyddiol ac yn ein hatgofion ein hunain fel ffynonellau gwreiddiol syniadau ar gyfer straeon, ac yn ymarfer adeiladu bydoedd ffuglennol o dameidiau o lên gwerin sydd wedi’u darganfod, fel arferion, defodau a chredoau lleol. Byddwn yn dadansoddi swyddogaeth gwrthrychau mewn straeon gwerin ac yn arbrofi gydag adeiladu ein bydoedd stori ein hunain o’u cwmpas. Byddwn yn edrych ar y ffyrdd mae awduron ffuglen werin yn benthyca hud a grym llên gwerin a straeon i ddyfnhau ystyr ac i greu aflonyddwch mewn straeon cyfoes.

Dyma gwrs ar gyfer awduron sy’n gobeithio ymgysylltu’n ddyfnach â llên gwerin yn eu gwaith ysgrifennu a’i defnyddio fel ffordd o ysbrydoli gwaith gwreiddiol newydd. Does dim angen profiad blaenorol.