Pennaeth Tŷ Newydd: Leusa Llewelyn
Daeth Leusa yn Bennaeth Dros Dro ar Tŷ Newydd yng Ngorffennaf 2015, ar ôl symud i Lanystumdwy o Gaerdydd lle y bu’n gweithio i Llenyddiaeth Cymru am bedair mlynedd. Bellach yn Bennaeth llawn amser, hi sy’n gyfrifol am ofalu bod Tŷ Newydd yn rhedeg yn ddidrafferth o ddydd i ddydd. Ei phrif gyfrifoldebau yw trefnu’r rhaglen flynyddol o gyrsiau, creu partneriaethau, a gofalu fod profiadau ymwelwyr o’u arhosiad yn Nhŷ Newydd yn rhai cofiadwy a gwerthfawr. Mae hi wedi cyhoeddi dwy nofel i bobl ifainc, ac mae’n mwynhau beicio a mynd ar anturiaethau pell ac agos yn ei hamser hamdden.
Rheolwr Safle Tŷ Newydd: Miriam Williams
Ymunodd Miriam â thîm Tŷ Newydd ym Mehefin 2016 fel Swyddog Marchnata a Rhaglennu cyn cael ei phenodi yn Reolwr Safle Tŷ Newydd ym mis Gorffennaf 2019. Mae wrth ei bodd yn cyfarfod pobol o bob cwr o’r byd fel rhan o’i swydd, ac yn mwynhau sgwrsio dros baned a thôst yn y gegin. Miriam sy’n gyfrifol am drefnu ymweliadau mynychwyr, gan gynnig cyngor o flaen llaw a gofalu fod eu harhosiad yn Nhŷ Newydd yn gyffyrddus. Yn ei hamser sbâr mae’n mwynhau teithio i bedwar ban byd gan ddilyn hynt a helynt tîm pêl-droed Cymru, cystadlu a pherfformio gyda Chôr Alawon Llŷn ac yn brysur yn helpu gyda thafarn gymunedol y pentref, Tafarn Y Plu.
Swyddog Marchnata a Chyfathrebu: Angharad Ellis
Daeth Angharad i weithio i Dŷ Newydd ym Medi 2019 fel Swyddog Marchnata a Chyfathrebu yn syth ar ôl graddio o Brifysgol Bangor. Angharad sy’n gyfrifol am waith marchnata yn y ganolfan ac i Llenyddiaeth Cymru yn ehangach gan sicrhau bod presenoldeb Tŷ Newydd i’w weld ac i’w glywed ymhob man. Mae hi’n mwynhau ysgrifennu’n greadigol, cerdded a darllen ac yn aelod brwd o Glwb Ffermwyr Ifainc Dyffryn Madog gan gystadlu mewn amryw gystadlaethau.
Cydlynydd Arlwyo a Lletygarwch Tŷ Newydd: Anthony Cannon
Wedi ei eni dros y ffin yn Lerpwl, mae Tony wedi byw yng Nghymru ers 30 mlynedd. Yn gogydd ers 35 mlynedd, mae wedi gweithio mewn amrywiaeth eang o geginau yn ystod ei yrfa – o ffatri British Gas i fwyty â seren Michelin. Mae bellach yn gweithio yn Nhŷ Newydd yn arlwyo i grwpiau ac yn darparu ar gyfer eu hanghenion diet penodol, yn ogystal â rhoi arweiniad i wirfoddolwyr yn y gegin gan rannu ambell gyfrinach goginiol yn y broses. Mae Tony’n ddysgwr Cymraeg ac mae’n arbenigo mewn arlwyo ar gyfer dietau arbennigol (e.e. dim glwten, llysieuol, fegan ayyb). Ffaith ddiddorol am Tony: mae wedi cystadlu yn rhyngwladol i Gymru a Phrydain Fawr mewn Saethu Reiffl Galeri.
Rheolwr Llenyddiaeth yn y Gymuned: Mared Roberts
Daeth Mared i weithio yn Nhŷ Newydd ym Medi 2016; mae’n hi’n gofalu am brosiectau iechyd a lles ar hyd y gogledd ac yn ehangach i Llenyddiaeth Cymru, cynllun Bardd Cenedlaethol Cymru a gwyliau llên, ymysg pethau eraill. Mae Mared yn byw yn ei chynefin yn Arfon, wedi cyfnodau yng Ngheredigion a Chaerdydd. Mae hi’n mwynhau mynd am dro, darllen a threulio amser gyda theulu a ffrindiau ac yn jyglo hyn rhwng ceisio helpu yn y pentref gyda gwahanol bethau a rhedeg tacsi i’w phlant prysur.
Swyddog Cymunedol: Gwen Lasarus James
Mae Gwen yn gweithio fel Swyddog Cymunedol Gwynedd a Môn, ac yn cael crwydro o Gwm Pennant i Ddin Lligwy wrth ei gwaith. Ymysg ei chyfrifoldebau y mae datblygu partneriaethau yn lleol, trefnu teithiau llenyddol, trefnu Sgwad ‘Sgwennu Tŷ Newydd, a rheoli prosiect llenyddiaeth er iechyd a lles gyda grwpiau dethol yn y sir. Mae Gwen wedi cyhoeddi sawl nofel a drama i bobl ifainc yn y Gymraeg. Mae hi hefyd yn athro ioga yn lleol, ac yn dysgu dosbarthiadau Cymraeg i oedolion. Mae Gwen yn mwynhau cerdded ac wedi cerdded y rhan fwyaf o lwybr arfordir Môn a nofio yn y môr, ond nid heb ei wetsuit!
