Cwrs Cynganeddu

 Mae Mererid Hopwood yn Athro yn Adran y Gymraeg ac Astudiaethau Celtaidd Prifysgol Aberystwyth. Enillodd Gadair, Coron a Medal Ryddiaith yr Eisteddfod Genedlaethol. Ei chyhoeddiad diweddaraf yw cyfrol o gerddi, Mae (Cyhoeddiadau Barddas, 2025). Bu’n Fardd Plant Cymru ac mae wedi cyhoeddi cerddi a nofelau i blant. Mae wedi mwynhau cyfleoedd niferus i drafod llenyddiaeth mewn cymdeithasau a dosbarthiadau ledled Cymru, gan fentro weithiau i gymryd rhan mewn gwyliau llenyddol dramor. Mae’n talyrna ac ymrysona ac yn aelod o Ysgol Farddol Caerfyrddin. Bu hefyd yn Athro Barddol i raglen Pencerdd Llenyddiaeth Cymru i feithrin lleisiau newydd ym myd y gynghanedd. Derbyniodd Fedal Glyndŵr, Medal Dewi Sant y Prif Weinidog a Medal Gŵyl y Gelli am ei chyfraniad i lenyddiaeth. Hi yw’r Archdderwydd cyfredol ac Ysgrifennydd Academi Heddwch Cymru. 

Yn gyn athro uwchradd, Tudur Dylan yw cyd-sylfaenydd Ysgol Farddol Caerfyrddin sydd wedi meithrin beirdd cynganeddol dros gyfnod o 30 mlynedd.  Mae’n aelod o dîm Talwrn Tir Iarll, ac ef oedd Meuryn Ymryson y Beirdd yn yr Eisteddfod Genedlaethol am ugain mlynedd, cyn ildio’r fantell yn 2023. Enillodd Dylan Goron Eisteddfod Sir y Fflint yn 2017, a Chadair Eisteddfod Bro Colwyn yn 1995 ac eto yn Eisteddfod Eryri a'r Cyffiniau yn 2005. Ef oedd Bardd Plant Cymru yn 2004-05, ac mae wedi cyhoeddi cyfrolau o farddoniaeth a rhyddiaith, ynghyd â gwaith ffeithiol-greadigol i blant. Bu’n cydweithio â’r bardd Non Lewis fel Athro Barddol ar raglen Llenyddiaeth Cymru, Pencerdd, sy’n meithrin cynganeddwyr newydd. Ei gasgliad diweddaraf o gerddi yw Am yn Ail (Cyhoeddiadau Barddas, 2021) cyfrol ar y cyd â’i dad, Y Prifardd John Gwilym Jones.