Cwrs undydd: Ysgrifennu Tirweddau Cymru

Ymunwch â’r awdur Carwyn Graves am ddiwrnod ysbrydoledig o ysgrifennu ffeithiol greadigol yng nghanol tirlun godidog Eifionydd. Bydd y cwrs undydd hwn yn canolbwyntio ar archwilio a chyfleu tirluniau Cymru drwy eiriau ac yn eich annog i ddefnyddio eich synhwyrau a’ch ymwybyddiaeth amgylcheddol i greu darnau pwerus a chofiadwy.

Byddwch yn datblygu eich sgiliau sylwi, yn dysgu sut i ddefnyddio dull amlsynhwyraidd wrth ysgrifennu, ac yn darganfod ffyrdd o drawsnewid ymchwil hanesyddol, daearyddol neu bersonol yn destunau deniadol. Bydd eich tiwtor yn trafod sut i blethu pryderon yr argyfwng hinsawdd mewn i’ch gwaith mewn modd ystyriol, ac yn cynnig mewnwelediad i’r hyn sy’n gwneud tirluniau Cymru’n unigryw, hynafol a swynol- o’u bywyd gwyllt i’w pobl.

Mae’r cwrs yn addas i unrhyw un sy’n awyddus i feithrin perthynas ddyfnach â thirwedd Cymru drwy ysgrifennu. Dewch i ailgysylltu â thir, geiriau, a’ch llais creadigol.

Mae ein cyrsiau undydd yn addas i unigolion sydd heb brofiad o gwbl yn y byd ysgrifennu creadigol, a hefyd i’r rhai â pheth profiad eisoes. Mewn awyrgylch groesawgar, gynnes, bydd cyfle i chi ddysgu gan diwtoriaid sydd yn arbenigwyr yn eu maes. Mae croeso i’r chwilfrydig, ac i’r rheiny sydd yn chwilio am ddiwrnod o hwyl ac am gael dysgu rhywbeth newydd. Os am drafod a ydy’r cwrs hwn, neu unrhyw un o gyrsiau rhaglen 2025 yn addas i chi, cysylltwch â ni am sgwrs anffurfiol.

Bydd te, coffi a byrbrydau ar gael drwy’r dydd, a gweinir cinio ysgafn i bawb fel rhan o bris y cwrs. Os yn teithio o bell, neu awydd aros dros nos, holwch ni am bris llety neu cymrwch gip ar ein Bwthyn Encil Awduron, Nant.