Mae Iestyn Tyne yn fardd ac awdur, ac ef oedd un o sefydlwyr y cylchgrawn llenyddol Y Stamp. Mae’n olygydd i gyhoeddiadau annibynnol Y Stamp, ac wedi goruchwylio a chymell cyhoeddiadau sawl awdur newydd yng Nghymru dros y blynyddoedd diweddaf – gan roi llwyfan i leisiau newydd, ymylol yn aml. Iestyn yw trefnydd Cerddi Canol P’nawn, digwyddiad barddol teithiol sy’n rhoi llwyfan i awduron drwy wahoddiad a drwy gynnig gofod meic agored. Gyda Darren Chetty, Grug Muse a Hanan Issa, roedd yn gyd-olygydd Welsh (Plural) y gyfrol o ysgrifau ar ddyfodol Cymru, a chyrhaeddodd ei gasgliad o farddoniaeth, Stafelloedd Amhenodol, restr fer categori barddoniaeth Llyfr y Flwyddyn 2022. Ar y cyd â Leo Drayton, ef yw awdur Robyn (Y Lolfa, 2021), nofel i oedolion ifanc yng nghyfres Y Pump, enillydd categori yng ngwobrau Tir na n-Og a Llyfr y Flwyddyn yn 2022. Mae wedi ennill Coron (2016) a Chadair (2019) Eisteddfod yr Urdd, ac ef bellach yw Meistr Defod Wobrwyo Seremonïau Llenyddol yr Urdd. Mae wedi tiwtora yn Nhŷ Newydd ac ef yw Bardd cyntaf tref Caernarfon. Cyhoeddir Y Cyfan a fu Rhyngom Ni, ei gyfrol ffeithiol-greadigol sy'n dilyn llwybrau pryddest enwog Prosser Rhys, 'Atgof', gan Wasg y Bwthyn fis Mehefin 2025.
Tŷ Newydd ar Daith: Gweithdy Barddoniaeth (Arall)
Pryd: Dydd Sul, 2 Mawrth 2025
Amser: 2.00 – 4.00 pm
Lleoliad: Llety Arall
Tâl: £10
Mae Canolfan Ysgrifennu Tŷ Newydd yn dŵad am dro i Gaernarfon i gynnal gweithdy barddoniaeth fel rhan o ddathliadau Gŵyl Dewi Arall. Pwy well i arwain gweithdy o’r fath na Bardd y Dre cyntaf Caernarfon, Iestyn Tyne. Mae croeso i bawb – o’r rheiny sydd erioed wedi ysgrifennu darn o farddoniaeth o’r blaen ond sy’n awyddus i gael blas, i’r rheiny ohonoch sydd wedi hen arfer â sgwennu cerddi. Cewch flas ar sut beth yw gweithdy sgwennu, rhoi geiriau ar bapur a gadael â llond sach o syniadau i’w roi ar waith. I gyd-fynd â phenodiad Iestyn fel Bardd y Dref, byddwn yn mynd am dro bach i chwilio am ysbrydoliaeth o fewn waliau’r dref – ac yn canolbwyntio ein cerddi ar sylwi, clodfori a dathlu tameidiau bach o Gaernarfon.
Bydd y gweithdy yn addas i unrhyw un dros 16. Gan mai dim ond lle i 15 sydd ar y gweithdy hwn, gofynnwn i chi gofrestru o flaen llaw os gwelwch yn dda.
Tiwtor
