“Y bobl sy’n creu Tŷ Newydd; yr awduron, darllenwyr, tiwtoriaid a’r grwpiau o ddisgyblion sydd wedi ymweld â ni dros y 25 mlynedd ddiwethaf.” – Lleucu Siencyn, Prif Weithredwr Llenyddiaeth Cymru
Yn Ebrill 1990, agorodd Canolfan Ysgrifennu Tŷ Newydd, Llanystumdwy, ei drysau i’r cwrs barddoniaeth cyntaf. Ers yr wythnos hollbwysig honno dan ofal y beirdd Gillian Clarke a Robert Minhinnick, mae miloedd o oedolion a phobl ifainc wedi ymweld â ni bob blwyddyn i gymryd rhan mewn cyrsiau ysgrifennu creadigol preswyl ac encilion.
Rydym yn dathlu’r garreg filltir bwysig hon gydag ymgyrch codi arian newydd trwy gydol 2015. Mae’r ymgyrch £25/25 yn gofyn i bobl roi rhodd o £25; dim ond £1 am bob blwyddyn ers agor y Ganolfan. Bydd eich rhodd yn helpu ariannu: gweithgareddau addysgol ac allgyrsiol ar gyfer ysgolion a grwpiau ieuenctid; ysgoloriaethau i bobl o bob oed, gallu a chefndir i fynychu cyrsiau yn Nhŷ Newydd; gwaith estyn allan i’r gymuned leol; a gwaith cadwraeth i amddiffyn dyfodol yr adeilad rhestredig Gradd II* hanesyddol a diwylliannol hollbwysig hwn.
Gallwch ymweld â’r dudalen codi arian Just Giving trwy glicio yma.
