Pennaeth Tŷ Newydd: Leusa Llewelyn
Daeth Leusa yn Bennaeth Dros Dro ar Tŷ Newydd yng Ngorffennaf 2015, ar ôl symud i Lanystumdwy o Gaerdydd lle y bu’n gweithio i Llenyddiaeth Cymru am bedair mlynedd. Bellach yn Bennaeth llawn amser, hi sy’n gyfrifol am ofalu bod Tŷ Newydd yn rhedeg yn ddidrafferth o ddydd i ddydd. Ei phrif gyfrifoldebau yw trefnu’r rhaglen flynyddol o gyrsiau, creu partneriaethau, a gofalu fod profiadau ymwelwyr o’u arhosiad yn Nhŷ Newydd yn rhai cofiadwy a gwerthfawr. Mae hi wedi cyhoeddi dwy nofel i bobl ifainc, ac mae’n mwynhau beicio a mynd ar anturiaethau pell ac agos yn ei hamser hamdden.
Rheolwr Safle Tŷ Newydd: Ceri Collins
Mae Ceri wedi bod yn gweithio yn Nhŷ Newydd ers cychwyn 2014, ar ôl dychwelyd adra i Eifionydd o Ganada, lle y bu’n gweithio am 2 flynedd yn y Rockies ac yn Whistler. Mae wrth ei bodd yn cyfarfod pobol o bob cwr o’r byd fel rhan o’i swydd, ac yn mwynhau sgwrsio dros baned a thôst yn y gegin. Ceri sy’n gyfrifol am drefnu ymweliadau mynychwyr, gan gynnig cyngor a help llaw a gofalu fod eu harhosiad yn Nhŷ Newydd yn gyffyrddus. Pan nad yw’n gweithio, mae’n hoffi ymlacio gyda glasiaid o win coch o flaen operau sebon, a mynd i gigs a gemau Everton hefo’i chariad.
Swyddog Cymunedol: Gwen Lasarus James
Mae Gwen yn gweithio fel Swyddog Cymunedol Gwynedd a Môn, ac yn cael crwydro o Gwm Pennant i Ddin Lligwy wrth ei gwaith. Ymysg ei chyfrifoldebau y mae datblygu partneriaethau yn lleol, trefnu teithiau llenyddol, trefnu Sgwad ‘Sgwennu’r Ifainc Gwynedd, a rheoli prosiect llenyddiaeth er iechyd a lles gyda grwpiau dethol yn y sir. Mae Gwen wedi cyhoeddi sawl nofel a drama i bobl ifainc yn y Gymraeg. Mae hi hefyd yn athro ioga yn lleol, ac yn dysgu dosbarthiadau Cymraeg i oedolion. Mae Gwen yn mwynhau cerdded ac wedi cerdded y rhan fwyaf o lwybr arfordir Môn a nofio yn y môr, ond nid heb ei wetsuit!
Swyddog Marchnata a Rhaglennu: Miriam Williams
Ymunodd Miriam â thîm Tŷ Newydd ym Mehefin 2016 fel Swyddog Marchnata a Rhaglennu ar ôl cyfnodau yn byw yn Aberystwyth a Llanfair-ym-muallt. Bellach yn nol yn ei milltir sgwâr, Miriam sy’n gyfrifol am farchnata’r ganolfan a chynorthwyo gyda threfnu rhaglen gyrsiau Tŷ Newydd. Mae hi wrth ei bodd yn derbyn blogs gan fynychwyr Tŷ Newydd er mwyn eu rhoi ar ein gwefan (felly gyrrwch rai draw ati)! Yn ei hamser sbâr mae’n mwynhau dilyn hynt a helynt tîm pêl-droed Cymru, cystadlu a pherfformio gyda Chôr Alawon Llŷn, Lleisiau Llŷn a Seindorf Trefor ac yn aelod brwd o’r Ffermwyr Ifanc.
Cydlynydd Arlwyo a Lletygarwch: Anthony Cannon
Wedi ei eni dros y ffin yn Lerpwl, mae Tony wedi byw yng Nghymru ers 25 mlynedd. Yn ben-cogydd ers 33 mlynedd, mae wedi gweithio mewn amrywiaeth eang o geginau yn ystod ei yrfa – o ffatri British Gas i fwyty â seren Michelin. Mae bellach yn gweithio yn Nhŷ Newydd yn arlwyo i grwpiau ac yn darparu ar gyfer eu hanghenion diet penodol, yn ogystal â rhoi arweiniad i wirfoddolwyr yn y gegin gan rannu ambell gyfrinach goginiol yn y broses. Mae Tony’n ddysgwr Cymraeg ac mae’n arbenigo mewn arlwyo ar gyfer dietau arbennigol (e.e. dim glwten, llysieuol, fegan ayyb). Ffaith ddiddorol am Tony: mae wedi cystadlu yn rhyngwladol i Gymru a Phrydain Fawr mewn Saethu Reiffl Galeri.
Rheolwr Llenyddiaeth yn y Gymuned: Mared Roberts
Daeth Mared i weithio yn Nhŷ Newydd ym Medi 2016; mae’n hi’n gofalu am brosiectau iechyd a lles ar hyd y gogledd ac yn ehangach i Llenyddiaeth Cymru, cynllun Bardd Cenedlaethol Cymru a gwyliau llên, ymysg pethau eraill. Mae Mared yn byw yn ei chynefin yn Arfon, wedi cyfnodau yng Ngheredigion a Chaerdydd. Mae hi’n mwynhau mynd am dro, darllen a threulio amser gyda theulu a ffrindiau ac yn jyglo hyn rhwng ceisio helpu yn y pentref gyda gwahanol bethau a rhedeg tacsi i’w phlant prysur.
