Mae Tŷ Newydd yn trefnu cyrsiau ysgrifennu creadigol preswyl ac undydd i ysgolion cynradd, uwchradd, prifysgolion a sefydliadau addysg uwch eraill. Mae pob cwrs yn unigryw.
Rydym yn gweithio gyda’r athrawon i drefnu cyrsiau wedi eu teilwra yn arbennig, gan gynnig dewis o genre, cynnwys a thiwtoriaid addas ar gyfer y grŵp.
Mae Tŷ Newydd yn cynnig awyrgylch ysbrydoledig, yr amser, gofod a hunan-hyder i’r bobl ifainc archwilio eu potensial fel awduron. Byddant yn derbyn cyngor a mentora gan awduron proffesiynol ac yn mwynhau cyfleoedd i deimlo, ymateb a rhannu drwy ysgrifennu.
Dywedodd athrawes o Ysgol Abererch, Pwllheli,
“Profiad bythgofiadwy oedd cael bod yn rhan o awyrgylch arbennig Tŷ Newydd – cafodd effaith gadarnhaol ar agwedd a hyder y plant. Daethant yn ôl i’r ysgol gyda thân yn eu boliau a’r awydd i ysgrifennu mwy! Diolch i Llenyddiaeth Cymru am y profiad arbennig.”
Bydd yna sesiynau grŵp, sesiynau un-i-un gyda’r tiwtoriaid, darlleniadau, a chyfle i’r disgyblion a’r myfywyr weithio’n unigol ar eu hysgrifennu.
Mae pawb yn byw gyda’i gilydd yn Nhŷ Newydd ar gyrsiau preswyl, ac mae’r awyrgylch yn hamddenol ac yn anffurfiol. Mae’r disgyblion a’r myfyrwyr yn helpu eu hunain i frecwast a chinio ac yn helpu, fel rhan o dîm, i baratoi un pryd fin nos i weddill y grŵp. Gallwn gysgu hyd at 20 o ddisgyblion neu fyfyrwyr.
Am fwy o wybodaeth, ac i drefnu cwrs i’ch ysgol neu’ch prifysgol chi, cysylltwch â ni: tynewydd@llenyddiaethcymru.org / 01766 522811.